英超 寸王親口話你知真‧紅魔四天王

作者:Brenda 發表日期:2017-10-01 09:02:01

曼聯眾星盧卡古、前鋒拉舒福特、中場保羅普巴同後備殺手安東尼馬迪爾,今季幫球隊創出110年球會最佳開局,被捧成紅魔「新暗黑四天王」。不過,領隊莫連奴就唔係咁睇,仲喺大勝水晶宮賽後,話畀大家知佢心目中嘅「真‧四天王」係乜水!

雖然桑馬達喺車路士年代,一度被寸王棄用,先會有機會成魔,但係呢位葡萄牙領隊到咗紅魔之後,反而認為佢最靠得住。另一個係尼曼查馬迪,寸王同馬達喺車仔一齊同呢位防中共事過,雖則之前寸王曾經批評過馬迪控球時間過長,但係睇嚟依家睇法唔一樣曬喎!

安達靴裏拉季初上陣時間唔多,仲同寸王嘈過,但係寸王依然覺得呢位西班牙中場信得過,所以榜上有名。最後一位當然係隊長啦,信唔過又點可以成為紅魔Captain呀?卡域克唔出場個時,路爾斯華倫西亞就會成為紅魔隊長,場上表現十分可靠,寸王信得過梗係唔出奇啦。

寸王話:「我需要成熟嘅好球員,有團隊精神嘅人。我知道依家呢一代好多都自我中心,都係因為個社會同身邊嘅人令到佢哋變成咁,所以我需要馬達、靴裏拉、華倫西亞、馬迪,我可以做得更好。」各位球迷又認唔認同寸王嘅人選呢?

東網體育同你追實體壇每個精彩時刻!
http://bit.ly/2ecTF2A


本文來源:http://hk.on.cc/hk/bkn/cnt/sport/20171001/bkn-20171001083034001-1001_00882_001.html




Tag:
本文鏈接:http://www.cateringhk.com/28550.html