小心惡犬 1/3 Dog Alien發狂預告

作者:Estelle 發表日期:2017-10-31 05:07:02

可以不愛,不要傷害,原來殘害毛孩嘅唔只人類,仲有Alien!喺《Alien 3》之中,Alien唔只向人類埋手,就連狗都唔放過,用獵犬做宿主爆體孵化出Dog Alien(Xenomorph XX121,又名Runner),雖然冇Alien Queen,咁有霸氣,又冇Warrior Alien咁有團隊精神,不過勝在速度快、機動性高,似足原來嘅宿犬般,畀佢盯上就極難甩身,加上四腳爬行嘅特徵,異形嘅鐵粉又點會唔記得?

咁有發揮性嘅題材,自然受到唔少Figure品牌青睞,去年就有壽屋嘅ARTFX+ Statue雕像系列,炮製出1/10 Dog Alien,高約15cm;同屬日系品牌嘅Prime 1 Studio,最近宣布與CoolProps合作,製作1/3版本,體形更加嚇人,高約66cm、長約74cm,而且全身造工更加講究。

Prime 1 Studio × CoolProps 1/3 Dog Alien擺出四腳佇立嘅姿勢,前腳蹬直、後腳屈膝,蓄勢待發準備撲向獵物。全身既有精細嘅筋腱脈絡雕工,表面又做足光油處理,從視覺上還原Alien嗰種滑孱孱嘅質感,至於Dog Alien獨有嘅身體特徵,例如長長嘅尾巴、尾端呈刀片狀,仲有似足狗爪般又長又大嘅前掌,呢款1/3雕像都一一做到。除此之外,1/3 Dog Alien分為標準(MMAL-01)與DX(MMAL-01DX)雙版本,分別全球限量800與1,000套,前者既有雕像主體,仲有以監獄為景嘅地台,頭像設計成開口形態,至於招牌式的「口中口」,就可以換件形式,做出正常與伸長兩款形態;DX有齊標準版嘅內容外,仲多咗一個闔埋口嘅頭像,頭像部分仲可以拆解變成胸像。正所謂慢工出細貨,無論係標準版或DX版,廠方預期要明年11至2019年1月才交到貨,如果還原到官圖八、九成水準嘅話,相信粉絲都唔怕等,真正擔心嘅係夠唔夠銀彈找數,事關價錢真係非比尋常,依家喺官網( http://www.prime1studio.co.jp )落訂嘅話,分別誠惠164,900及186,900日圓,就算係Kidult一分子嘅小編,都只好嘆句︰有心冇(財)力。


本文来源:http://hk.on.cc/hk/bkn/cnt/lifestyle/20171031/bkn-20171031100018402-1031_00982_001.html




Tag:
本文鏈接:http://www.cateringhk.com/31692.html