賭仔回頭金不換 北愛今鬥瑞士靠拉菲迪翻身

作者:SAMANTHA 發表日期:2017-11-12 21:02:08

即上英超刨績王:http://win.on.cc/epl 

世盃外歐洲區附加賽打到如火如荼,今晚北愛爾蘭就會喺次回合作客瑞士,睇吓可唔可以收復首回合輸0比1嘅失地。不過北愛今晚想贏波,食粥食飯睇嚟要靠晒「賭仔」拉菲迪,呢個赫斯前鋒上年畀人踢爆佢瘋狂賭波,搞到畀英格蘭足總處分,然後先至乘勢戒賭。今季佢谷底大翻身,轉戰蘇超表現Fit到漏油,真係賭仔回頭金不換,今晚唔係唔撐佢呀?

現年30歲嘅拉菲迪,球員生涯踢過般尼、格拉斯哥流浪同諾域治等,代表北愛爾蘭上陣58次射入20球,算係個唔錯嘅射手。不過,佢話自己由青年時期已經沉迷賭博:「賭錢最需要係錢同時間,作為足球員,我兩樣都有。我每日1點半練完波,成個下晝點賭都得。你睇吓成個蘇格蘭,唔係威廉希爾盃,就係立博超級聯賽,球場上都係Bet365廣告牌,就算你下載個app,都有賭波網廣告彈出嚟,呢啲都好影響住你。」

拉菲迪話自己即使喺2012/13球季轉去瑞士踢錫永,結果咪日日掛住賭冰球,又係超沉迷:「我班隊友好熟冰球,成日話畀到貼士我,佢哋知我鍾意賭,但唔知我沉迷上癮。」好彩,直到舊年2月,拉菲踢畀足總發現佢賭波,然後喺8月正式向佢罰款23,000鎊,但呢筆錢可能係佢成世人使得最抵一筆,因為終於令佢面對自己問題,嘗試戒賭。

呢位北愛射手話佢喺戒賭過程中,有好多球員行家同球迷幫過佢,當中仲包括以前同樣沉迷賭博嘅蘇格蘭名將赫臣,佢哋有試過一齊出席戒賭聚會,互相扶持勉勵,依家佢仲諗住加入幫人戒賭行列添!

拉菲迪同時指出,今季加盟赫斯係令佢重生嘅關鍵,因為球會對佢給予全力支持:「有人問我戒賭前後表現有冇分別?但自從我戒咗賭,我好似壓力輕咗好多,同埋踢波時候都開心咗好多,我踢8場就入咗5球,我覺得真係好有幫助。」拉菲迪今季為赫斯喺蘇超同蘇聯盃夾夾埋埋踢咗16場就入咗9球,狀態真係相當唔錯,今晚佢會代表北愛爾蘭出戰瑞士,睇吓佢可唔可以做英雄,帶領球隊殺入決賽周啦!

東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20171112/bkn-20171112200924883-1112_00882_001.html




Tag:
本文鏈接:http://www.cateringhk.com/38529.html